السلام عليكم احبتي طبتم وطابت اوقاتكم
لاول مرة راح اتكلم باللهجة الشعبية العراقية (لهجتي) بهذا المنتدى
طبعا اني من تقريبا 3 سنوات من توفة اخوي محمد (العضو الرائع اللي كلنا
حبيناه وحبينا روحة المرحة جيم باور) هذي اول مرة ادخل للمنتدى بعد هذي السنين
صراحة لعدة اسباب انقطعت عنة والسبب الاول والرئيسي هو كلما ادخل للمنتدى
هذا فجأءة يمتلي المكان برائحة اخوي محمد والنبي بعد ما اكدر اشوف بعيوني بوقتها
حتى هسى من دخلت وشفت مشوراتة اجيت اموت والله العظيم من يوم توفة لحد هذا
اليوم ما اكدر اشوف صورتة ابد ولا اتجرء ان افكر بيه حتى وهذا المنتدى يرجعلي
الذكريات الاليمة ..
والسبب الثاني انه اني دخلت كلية الطب (حلمي) بفضل رب العالمين وهسى اني
مرحلة رابعة كلية الطب بعدلي سنتين واتخرج ان شاء الله عمري صار 21 سنة
وهذا الي اشغلني هواي ان ادخل للمنتدى فصار عندي هواي مشاغل ودراسة الطب
صعبة مثلما تعرفون ..
هذي اول مرة راح اذكر اسمي بهذ المنتدى
اسمي فرح علي اعيش بالنجف محافظة موجودة بالعراق ادرس في كلية الطب
طبعا لعل احد من الاعضاء القدامى يمر صدفة ويشوف هذا المنشور
احب اكولهم شكرا جزيلا على الاوقات الرائعة الي قضيتها وياكم صدكوني
مراح انساكم ابد واتمنى من كل قلبي انه نرجع من جديد سوى ونبني هذا المنتدى
مثل قبل ونخلي اجمل منتدى انمي بالعالم .. اعرف انه كل واحد بيكم هسى كبر
وعندة حياة خاصة لكن الانمي مثلما جمعنا من قبل اتمنى يعيد شملنا مرة ثانية
اتمنالكم التوفيق والحياة السعيدة اينما كنتم
وانا اؤمن انه سيأتي يوم نحن فيه جمعنا الى هذا
المكان ونجتمع مرة اخرى هنا وستكون روح محمد معنا
شكرا لكم على كل شئ سوف اعود كثيرا الى هنا
على امل لقياكم من جديد
الى لقاء قريب
احبكم في الله جميعا